Entroido!!

 Como cada ano estas semanas estivemos traballando arreo nos disfraces, aqueles que nos servirán para deixar boquiabertos aos asistentes ao desfile polas rúas de Begonte

E si, non é para menos, vaia traxes máis chulos resultaron 😍

Como non podía ser doutra maneira tivemos moi presente o noso proxecto de centro; Oído cociña!

Os máis pequenos do cole vestiron o seu mandil e gorro para mostrar que son uns verdadeiros Chefs, pois levan traballando moito sobre a cociña e as súas técnicas culinarias.

Se a alimentación sá se refire non poden faltar as froitas e verduras.

Uvas🍇 e laranxas 🍊 representando á vitamina C ( 1º e 2º EP) e tomates 🍅e leitugas 🍀 como as mellores verduras para elaborar ricas ensaladas (3º e 4º EP).

Fonte de fibra, hidratos de carbono e azúcre en cantidades moderadas aparecían nas etiquetas das caixas de cereais 🌾elaboradas polo alumnado de 5º e 6º EP.

Uns cereais para nada típicos, non están á venda en calquera establecemento, pois teñen "denominación de orixe" etiquetados e producidos na nosa escola 😂

Tendo este vídeo, pouco máis se pode apuntar.

Pasámolo xenial!!

Moitas gracias ás familias por colaborar na elaboración dos disfraces e por arrouparnos no desfile 💓

Oído cociña, está de Entroido

23 F: Día de Rosalía de Castro

 LIBERA E LE!

23 de febreiro, aniversario do nacemento de Rosalía de Castro, unha das grandes escritoras e poetas do Rexurdimento Galego.

Celebramos este día liberando poemas de Rosalía de Castro, cada grupo traballou con distintos versos, vivindo de novo na voz dos nenos e nenas a súa obra.

Esta actividade, programada ao carón do Equipo de Dinamización da Lingua Galega, versa sobre a idea de que os nenos e nenas coñezan a obra da escritora a través de xogos ou pistas, sempre adaptado á idade do alumnado.

 Polo que, os máis pequenos, valéronse de relacionar os versos coas ilustracións dos libros empregados para a actividade.

Que foron os seguinte:

 

E quedou unha actividade así de bonita 💚

"Unha xigante que non precisa respiración asistida, nin prantos, nin ritos florais. Os pulmóns da súa obra aférranse ao futuro e ínflanse coa forza dun país que respira cultura por cada fenda".

(Ledicia Costas no seu manifesto no Día de Rosalía) 

Contacontos con Inma Cuesta

 Chegou á Casiña de Faiuco Xela, unha superheroína de aldea que goza da natureza.👧

Unha nena comprometida co medio rural que destaca os beneficios que ten vivir na aldea, contando as súas aventuras dunha forma divertida e entretida😉

Inma Cuesta reuniu ao alumnado de Educación Infantil para traballar con eles a educación ambiental en relación á alimentación, coa axuda de Xela e uns cantos animaliños, tivemos unha reunión moi gratificante.

Tanto é así que nos animamos a cantar e bailar🎼.

Rematamos esta actividade facendo unha selección de alimentos que son máis comprometidos e respectuosos co medioambiente, como as verduras que cultivamos nas nosas hortas, con aqueles que fan que xeremos demasiados resiudos plásticos e aínda por enriba non son próximos a nós.

Velaquí algunhas fotos da sesión con Inma.

Moitas gracias Inma polo teu bo contar!!

Obradoiro de lettering

 A arte de debuxar letras 

Os nenos e nenas de 4º, 5º e 6º EP asistiron ao obradoiro dos primeiros pasos do lettering con brushpen 📋

Non podemos confundir a caligrafía con esta arte, debemos reservar o primeiro termo para falar de escribir palabras. En cambio, se debuxamos letras, construímos símbolos cuns trazos ou rotulamos con diferentes técnicas iso é o lettering✏

Belén "Nacu", graduada en deseño gráfico, foi a encargada de iniciarnos nesta técnica.

Tamén apuntou a importancia do agarre do brushpen, que non é igual a dun rotulador normal así como a postura que adoptamos.

Un obradoiro con moitas posibilidades para modificar o aspecto dos nosos textos ou palabras, facéndoos máis atractivos.

A beleza da escritura!

Cadeira Vermella

Un dos principais obxectivos do préstamo de contos na etapa de Educación Infantil é a animación á lectura e o gusto pola escoita de historias. Por iso, non hai mellor reflexo do traballo feito que escoitar aos máis pequenos contando a historia 💕

Nesta ocasión foi Natalia, de 4 anos, a que sentou na cadeira vermella para renarrar o conto " Un día en la sabana".

Descubrirían as 30 especies que amosa este fantástico conto❓

Así de atentos e atentas escoitan a Natalia os seus compis!

Moi ben Natalia!!

11F

A ONU propuxo establecer o 11 de Febreiro como o Día Internacional da Nena e Muller na Ciencia para lograr o pleno acceso e equidade no ámbito científico e tecnolóxico das mulleres👩👧

Ademais é un dos obxectivos da Axenda 2030, a igualdade, sendo as bibliotecas escolares un magnífico  espazo para traballar nesta brecha de xénero.

Na nosa escola quixemos visibilizar o traballo das mulleres no ámbito da cociña relacionado coa Ciencia facendo un taller de conservación de alimentos 🔬

Para iso botamos man da familia de Sabela, 6º EP, que ten moita experiencia neste ámbito, rexentan un restaurante na nosa contorna.

Programamos tres talleres sinxelos para que todo o alumnado puidera coñecer un método de conservación dos alimentos. 

Os máis pequenos envasaron boliños preñados, empregando a máquina de envasar ao baleiro. Conservando o boliño durante máis tempo sen que se poña en mal estado.

Non sabemos canto dos nenos e nenas lograrían gardar o seu boliño...😂

Logo, a nai e a avoa de Sabela ensinaron aos nenos de 1º , 2º, 3º e 4º EP como envasar salsa de tomate caseira 🍅 ao baño María. Sen esquecer o etiquetado de cada tarro, pois é fundamentar anotar a data.

Por certo, a salsa estaba boísima 👌

Finalmente, os maiores do cole puxéronse mans á masa coa empanada!

Qu método empregarían para conservar un producto fresco e que non perda as súas propiedades❓

pois si, o envasado.

 Tendo moi en conta a data, alérxenos, o número de lote de cada alimento que empregamos, a temperatura a que debe estar.... unha morea de cousas!!

Unha xornada na quue demos un paso máis no noso proxecto " Oído Cociña!", valorando o traballo das cociñeiras e a súa relación coa Ciencia.

Se queredes ver fotiños dos talleres, dádelle ao 👉PLAY!

Moitas gracias a Rocío e Marina por compartir esta xornada con nós, foi un pracer tervos na Escola!

Visita ao Teatro, Gadis e Centro de artesanía

 Na pasada semana, o alumnado de quinto e sexto saíu da escola e puxo rumbo a Lugo. 

O mércores para participar nunha divertida obra de teatro (My funny Frankenstein), na que tiveron que poñer en uso todos os coñecementos adquiridos nas aulas de inglés, para achegarse a esta peculiar versión da obra de Mary Shelley.

O xoves visitaron o supermercado Gadis, onde dentro do programa Alimentes e en relación ao noso “Oído, cociña” aprenderon sobre a dieta saudable, os grupos de alimentos e o chamado “prato de Harvard”.

 A continuación, visitaron a colección do Centro de Artesanía e Deseño da Deputación de Lugo, alí achegáronse a parte da súa colección, coñecendo antigas técnicas de olería tradicional, composición de libros e fabricación de instrumentos tradicionais galegos.

 Rematou a visita cun obradoiro no que elaboraron, cunhas palliñas plásticas, pequenas gaitas á usanza daquelas que facían os nosos antergos con pallas de alcacén cando alindaban o gado no monte.

Día da paz e a non violencia

 Na área de Relixión, todo o alumnado, colaborou na elaboración dun mural moi vistoso😍

Nel traballaron coa receita para a paz, facendo alusión á tolerancia, respecto, axuda, empatía, comprensión, amor, paciencia... como "ingredientes clave" para logar unha mellor convivencia.

Do mesmo xeito, os máis pequenos, fixeron que da árbore da vida brotara o amor, que precisa de moitos coidados para que sigan crecendo os froitos da alegría e o respecto.

A modo de caligrama, para conmemorar o día da escritura a man, escribiron tanto a receita para a paz, nun mandil, como no tronco da árbore algún verso sobre os valores da vida.

Fantástico traballo!