Obradoiro de radio

Para rematar o segundo trimestre o alumnado do terceiro ciclo de EP asistiu á segunda parte do obradoiro de radio, formación enmarcada dentro do programa Radio na Biblio, da man de Baruk e Pablo.

Coa intención de darlle máis personalidade a nosa Radio Corpiño 📻crearon e gravaron sintonías e indicativos para cada unha das posibles seccións que se poidan facer: entrevistas, información, radio en directo, anuncios radiofónicos...

Tendo en conta que a nosa radio escolar queremos que medre e tela moi presente no día a día, pensamos en posibles seccións para futuras emisións. Tanto é así, que tentamos que os "recordatorios de marca" empregados nas radios comerciais teñan cabida tamén na nosa.

Agora si, Radio Corpiño: falamos un pouquiño?

Graciñas Pablo e Baruk pola vosa disposición e agardámosvos na nosa radio.

Radio Corpiño: falamos un pouquiño?

 O voluntariado da biblio asiste a unha formación moi especial da radio📻

Da man de Baruk e Pablo aprenderon os rudimentos da linguaxe radiofónica e da composición de melodías, os nenos e nenas foron conscientes da importancia da palabra, da música, dos sons e dos silencios. 

Toca practicar!! E na Sala de Robótica escoitábase a un grupo de rapaces e rapazas entusiasmados/as coas gravacións de sintonías, caretas, jingles e indicativos para a nosa radio.

Algo que ao principio parecía imposible ao rematar a sesión fíxose realidade, cun traballo en equipo e con boas indicacións queda gravada a nosa sintonía para Radio Corpiño.

Polo tanto, este curso conmemoramos o día da radio, 13 de Febreiro, dándolle cada vez máis vida a nosa. Facéndoa persoal e próxima a nós, ao que somos, un cole con moitas ganas de contar cousas!

Queredes saber como foi? Póñede atención ao vídeo resumo desta sesión

Moitas gracias aos nosos formadores por tanto agarimo e bo facer, esperamos que sexa a primeira de moitas visitas.

Radio Corpiño: falamos un pouquiño?

 

Formación audiovisual II

 O alumnado do terceiro ciclo de Educación Primaria segue a participar nas sesións de formación sobre gravación e edición de curtas📹

Na sesión do pasado venres tocou saír ao exterior, gravaron no propio Belén. 

A intención é potenciar e mellorar o seu manexo e dominio con certos dispositivos para recoller material para a posterior fase. 

Tiveron que poñer en práctica o aprendido sobre a escolla de planos, personaxes, trama, diálogo...

Deixamos por aquí unhas cantas fotos da xornada de gravación

Graciñas Begoña por sabernos guiar tan ben 😊

Formación audiovisual

 Durante tres venres deste mes de novembro o alumnado de 5º e 6º EP participa nunha formación de creación e edición de vídeo📹

Froito dunha colaboración da nosa escola co Belén de Begonte nacen estas xornadas audiovisuais, coa finalidade de darlle ferramentas ao noso alumnado para participar no Certame Audiovisual que organizará o Belén de Begonte na próxima tempada.

Unhas sesións moi entretidas na sala de robótica a cargo de Begoña Pérez. Puideron achegarse un pouquiño máis á produción, edición e gravación dunha curta; comezando por distinguir os tipos de planos que hai e como empregalos na escena. 

Velaquí algunhas fotiños que rescatamos do blogue dos maiores do cole "terceiroCICLO" sobre a xornada do pasado venres.

Na próxima sesión, máis 😄!!